[La suba teksto aperas en la novembra kajero de “La
Ondo de Esperanto”.]
Proklamo de Poznano
Proklamon pri elĉerpiĝo de la paradigmo finvenkismo-raŭmismo kunverkis
István Ertl kaj Zbigniew Galor, kiu ankaŭ prezentis ĝin enkadre de la
XIX-a ARKONES — 27.09.2003. — en Poznań (Pollando) dum primovada panel-diskuto,
kiun gvidis Tadeusz Chrobak. Ni ĝin aperigas por pripensigi la legantojn.
Se vi opinias same, bonvolu sendi mesaĝon kun vorto Jes! kaj via
nomo al adreso: zgalor@au.poznan.pl
(I.E., Z.G.)
PROKLAMO PRI ELĈERPIĜO DE LA PARADIGMO FINVENKISMO-RAUMISMO
Ni, sube subskribintaj partoprenantoj de la XIX-a ARKONES en Poznań,
rekonante
ke la koncepta paro finvenkismo-raŭmismo estas unu el la plej sterilaj
neologismoj de la esperanto-movado en la lasta kvaronjarcento,
ke dokumentoj kritike opiniantaj pri ĝi restas nerimarkataj, kiel la
Proklamo de Voss el 1991, kiu diras
ke … konflikto inter kultur-flegemaj kaj fin-venkemaj esperantistoj
estas transpontebla…,
konstatinte
ke finvenkismo kaj raŭmismo, se entute nomi ilin tiel, kunloĝas en ĉiu
el ni,
ke la ĝisnuna praktiko uzi ĉi tiun pensokadron evidente pruvis ties
falsecon, dogman, valorpritaksan karakteron, malantaŭ kiu troviĝas vulgare
ideologia pensadmaniero,
ke la koncepta paro damaĝas la riĉan bildon de ideologioj ligitaj
kun la esperanta movado, ĉar ĝi devigas pensi nur pri du el ili, kvankam
ekzistas tiaj historiaj ideotendencoj kiel: laborista movado, kristanisma
socidoktrino, novaj sociaj movadoj, ideologio de hobiismo - ĉiu el ili
elemento de riĉeco de la esperanto-kulturo,
rekomendante
al ĉiu esperantisto, kiu ne kutimas trakti mitojn kiel faktojn
proklamas
elĉerpiĝon de la paradigmo finvenkismo - raŭmismo!
Detlev Blanke
Tadesz Chrobak
István Ertl
Zbigniew Galor
Georgo Handzlik
Paweł Janowczyk
Zbigniew Kornicki
Ilona Koutny
Poznań, 27.09.2003.
ARKONES | Novaĵoj