La 14an de majo 2004, vendrede, en la kaliningrada kulturpalaco de maristoj okazis publika prezentiĝo de Kaliningrada Regiona Esperantista Unuiĝo (KREU) okaze de la dujara datreveno de ĝia ekfunkciado. La kunvenon gvidis nova esperantisto — kaliningrada studento Oleg Daniljuk, kiu en decembro 2003 finis la elementan kurson de Esperanto ĉe KREU.
Halina Gorecka, la prezidanto de la unuiĝo, rakontis pri la agado kaj planoj de KREU. Aleksander Korĵenkov, redaktoro de La Ondo de Esperanto kaj komitatano de UEA, revuis la lastatempan esperantistan aktivadon en la mondo, aparte en Eŭropo. Prezidanto de Litovia Esperanto-Asocio, Povilas Jegorovas, diskonigis la sperton de la esperantista agado en Litovio, kiu venont-somere akceptos la 90an Universalan Kongreson de Esperanto.
Inter la ĉeestantoj estis kelkaj ĵurnalistoj kaj vickonsulo de Pollando,
Andrzej Opaliński, kiu en la bufeda regalo faris spritan bondeziran paroladon
kaj invitis esperantistojn denove partopreni la Zamenhofan Tagon en la
Ĝenerala Konsulejo de Pollando en Kaliningrado.
La datreveno de KREU estis menciita radie kaj gazete.