Vikipedio: Volapuko “superis” Esperanton
Aleksej Korĵenkov, 18-jara kaliningrada esperantisto, recenzante por La
Ondo de Esperanto la broŝuron Vikipedio: Praktika Manlibro
(Espero, 2007) trovis, ke la Volapuka Vikipedio superas la Esperantan Vikipedion
laŭ la nombro da artikoloj.
Efektive, la statistiko
konfirmas, ke Volapuko estas en la 15a loko, kaj Esperanto en la 17a:
| 1. |
Angla |
2.003.106 |
| 2. |
Germana |
636.891 |
| 3. |
Franca |
555.620 |
| 4. |
Pola |
423.525 |
| 5. |
Japana |
411.607 |
| … |
… |
… |
| 15. |
Volapuko |
111.926 |
| 16. |
Turka |
91.161 |
| 17. |
Esperanto |
88.617 |
| 18. |
Slovaka |
81.044 |
La redakcio de La Ondo petis klarigojn ĉe la redaktoro de la
recenzita broŝuro, Yves Nevelsteen.
LOdE: Kial la libera ret-enciklopedio en Volapuko tiel rapide progresis?
YN: La Volapuka Vikipedio
antaŭ nelonge subite kreskis de 797 al preskaŭ 112000 artikoloj, larĝe
superante Esperanton kaj aliajn pintajn lingvojn. Per roboto, eta komputila
programo, Sergio Meira aŭtomate tradukis centmilon da geografiaj artikoloj
de la anglalingva Vikipedio. La artikoloj ŝajnas bonege verkitaj, kun
amaseto da informoj, mapoj kaj kun aldono de kategorioj.
LOdE: Ĉu ankaŭ esperantistoj uzu ĉi tiun manieron?
YN: Esperantistoj jam sukcese per roboto amaskreis ekzemple 8000 artikolojn
pri italaj urboj en februaro 2006. En la vikipedia diskutejo multaj homoj
kontraŭis tion. Ekestis problemo pri la samnomeco de municipoj kaj ordinaraj
Esperanto-vortoj; tia unufoja amaskreado ĉiam kaŭzas multe da kontrollaboro
de la kontribuantoj. Laŭ multaj vikipediistoj absolute ne indas havi informojn
en enciklopedio "pri ĉiuj etaj vilaĝetoj".
Mi persone opinias ke necesas nepre koncentriĝi je la kvalito de artikoloj
kaj je artikoloj kiuj iel rilatas al Esperanto: pri la historio de Esperanto
(ekzemple http://eo.wikipedia.org/wiki/Historio_de_UEA),
pri aŭtoroj kies verkoj estas tradukitaj al Esperanto (ekzemple http://eo.wikipedia.org/wiki/Tolkien)
kaj pri urboj kiuj ludas gravan rolon por esperantistoj (ekzemple http://eo.wikipedia.org/wiki/Bialystok)
La recenzo de la Vikipedia manlibro aperos en la oktobra kajero de
La
Ondo de Esperanto, sed pliajn detalojn pri la kazo de Volapuko oni
povas trovi en jena paĝo.
Ekzemplo de aŭtomate kreita artikolo
pri vilaĝo.
Libera Folio aperigos hodiaŭ artikolon de Yves Nevelsteen pri
ĉi tiu temo.
LOdE
Novaĵoj | Enirpaĝo