Ĉi tiu teksto aperis en la februara kajero de La Ondo de Esperanto
(2010). Oni rajtas aperigi ĝin plene aŭ parte, se oni mencias la fonton
(La Ondo de Esperanto, 2010, №2).
Jaro 2009: niaj atingoj kaj fiaskoj
Inter la “Rondaj Tabloj” de La Ondo la plej tradicia estas la
jar-ŝanĝa. Ankaŭ ĉi-foje ni petis diverstendencajn aktivulojn respondi
la demandon: “Kiujn Esperanto-eventojn en 2009 vi taksas la plej pozitiva(j)
kaj la plej negativa(j)”. El la dek kvar demanditoj, dek afable sendis
siajn respondojn, kiuj estas ĉi-sube en la alfabeta ordo.
Peter Baláž
Slovakio
Kunordiganto de E@I, estrarano de EEU, eldonisto (www.espero.sk)
Plej pozitivaj aferoj de 2009:
— Google-subteno por Esperanto, omaĝe al la 150-jariĝo de la naskiĝo
de Zamenhof;
— pluraj EU-projektoj, subtenantaj Esperanto-agadon;
— UK en Bjalistoko;
— IJK en Liberec;
— lanĉo de vendado de MP3-kantoj en Esperanto (http://www.vinilkosmo-mp3.com/);
— sukcesa agado de E@I, ĉefe la organizado de SES, financado far
EU kaj novaj projektoj.
Plej negativaj aferoj de 2009:
— manko de adaptiĝemo de niaj gvidaj organoj de la Esperanto-movado
al novaj kondiĉoj kaj ŝanĝiĝanta mondo (ne nur estas afero de la jaro
2009, sed ĝi daŭris ankaŭ en ĝi);
— subtaksita kaj malfeliĉe realigata modernigo de Pasporta Servo;
— ofta amatoreco de la Esperanto-agado, malkapablo de starigo de
klaraj celoj kaj strategioj por ilia atingo.
Renato Corsetti
Italio
Prezidanto de Itala Esperanto-Federacio
Plej pozitiva atingo en 2009 estis la afiŝado fare de Google de la Esperanto-flago
en la komenca paĝo. Tio abrupte transformis la bildon pri Esperanto ĉe
multegaj homoj de mortinta lingva utopio al vivanta strebo en la direkto
de lingva egaleco. Tio ankaŭ montris la vojon al aferoj, kiujn la movado
devus pli konscie organizi. Mi revas pri tempo, en kiu UEA ne plu aranĝos
Belartajn Konkursojn sed almenaŭ ankaŭ Belinformajn Konkursojn.
Plej negativa fenomeno, laŭ mi, estas la preskaŭ absoluta malinteresiĝo
de la movado pri la nova labor-plano de UEA. Tio montras, laŭ mi, ke la
movadanoj ne plu esperas ion de UEA aŭ de si mem rilate al Esperanto.
Ili ja deziras la servojn, sed ne vere pensas, ke oni devus fari ion por
alparoli la mondon kaj ŝanĝi la situacion kaj eĉ ne pretas pensi pri
tio.
Probal
Dasgupta
Barato
Prezidanto de UEA
Certe unu plej pozitiva evento en 2009 mi taksas — sendepende de moraj
problemoj pri tiu elekto — la aperon de la Zamenhof-biografio
Homarano
de Korĵenkov. Ĝi ekzemplas solidan kaj gravan laboron, kaj spronos pli
da same altkvalita laboro.
La plej negativa evento en mia vidgamo estis la fakto, ke Zofia Banet-Fornalowa
sentis sin devigata proteste foriri de la bjalistoka Universala Kongreso.
Mi volas publike bedaŭri la fakton, ke — ĉar ŝi menciis al mi, eke
de nia unuafoja renkontiĝo, sian intencon momentojn antaŭ tiu protesta
foriro, kaj ĉar estis momento festa kiu ligis al mi la manojn — mi mem
ne trafis malhelpi la foriron mem, aŭ intervene okupiĝi pri la kialoj
(kiujn ŝi ja tute eksplicite klarigis al mi). Enmiksiĝi tiom malfrue
kaj deekstere en decidojn rilate la preparlaborojn enlande faritajn estis
preter la eblaĵoj je tiu stadio; sed tio ne malpliigas la intensecon de
mia bedaŭro.
Vjaĉeslav
Ivanov
Ruslando
Mi nomu nur la plej freŝan eventon, ĉar ĝi ŝokis min.
En decembro okazis ne nur rimarkebla kresko de atento al Esperanto (nelaste
pro malavara reklamo fare de Guglo), sed ankaŭ malĝoja por mi evento:
la nova tiparo PT Sans, kreita de la renoma moskva firmao
ParaType,
iĝis senpaga pro la subteno de la Federacia agentejo pri presado kaj amaskomunikiloj.
PT
Sans speciale celas etnajn lingvojn de Ruslando — probable la unuan
fojon en historio aperis tre bonkvalita tiparo uzebla por la ĉuvaŝa,
la tatara kaj la aliaj. Kvazaŭ moke, ĝi subtenas la tuton de “larĝigita
latina” parto (kun la polaj, ĉeĥaj kaj aliaj literoj), sed ne la Esperantajn.
Mi jam iniciatis oficialan leteron de REU al ParaType pri tio,
sed estas malagrable kaj malsekure dependi en tia demando de arbitra volo
de la direktoro en ParaType.
Maria
Sandelin
Svedio
Blogposedanto
Kiel ekzemplon pri pozitiva okazaĵo dum la pasinta jaro mi ŝatus mencii
la malfermon de la Esperanto-centro en Bjalistoko, kaj precipe la profesiece
faritan ekspozicion Bjalistoko de juna Zamenhof. Alia grava kaj
laŭdinda iniciato estas la libroserio Scienca penso.
Kiel malsukcesojn mi konsideras ekzemplojn flanke de estra(j) persono(j)
silentigi malbonajn novaĵojn, kiel (samkiel en la Roterdama UK) okazis
dum la Bjalistoka UK, kie la kongresa kuriero ne rajtis raporti pri la
atakoj direktitaj kontraŭ la kongreso. Mi bedaŭras konstati ke ĉi tiu
cenzuremo estas tendenco.
Jakvo
Schram
Belgio
Prezidanto de la Plenum-Komitato de SAT
Valoras diskuton, ĉu fakto ke la socio iom malkreskas pro ŝanĝanta socia
vivo, sed ke aliflanke multaj homoj lernas la lingvon pere de interreto.
Estas mirinde vidi kiel homoj pere de interreta kurso povas atingi altan
nivelon kaj uzadas la lingvon kun vervo. Problemo estas ke UEA, SAT kaj
la miloj de lokaj kluboj ne vere povas altiri la novulojn al la kluba vivo.
Donas iom da ĉagreno ke ni devas envie rigardi la malkreskon de aktivuloj
en lokaj kluboj. Sed tiuj, kiuj agadas pere de interreto por disvastigi
Esperanton riparas parte tiun perdon. Necesas do trovi manieron por revivigligi
la kluban vivon. La vorto estas al la nova generacio.
Ĉe SAT, post la emeritiĝo de Kreŝimir Barkoviĉ, la aktivuloj decidis,
pere de laborforto de volontuloj, mem prizorgi la necesan laboron. Fine
de la jaro la Plenum-Komitato de SAT povas konstati ke ĉiuj eventualaj
problemoj solviĝis.
La fondiĝo de Eldona Kooperativo montriĝas esti saĝa paŝo antaŭen.
Eldoniĝis pluraj novaj libroj, el kiuj “Plano B” estis la plej grava.
La studo por eldoni PIV en elektronika formo evoluas pozitive. Kies rezulto
devas esti ke PIV estos pli alirebla al pli grandlarĝa publiko.
La incidentoj dum la UK en Pollando devas instrui nin, ke batalo kontraŭ
rasismo kaj maltoleremo devas esti unu el la prioritatoj kontraŭ kiu ĉiuj
esperantistoj devas batali.
Laŭdon meritas Ipernity
kie multaj esperantistoj renkontiĝas virtuale kaj interŝanĝas salutojn,
kantojn, poemojn kaj rakontojn. Disvastiĝas kaj populariĝas per ĝi Esperanto
en plurlingva medio.
Giorgio
Silfer
Eŭropo
Verkisto, instruisto kaj organiza konsilisto, nuna Konsulo de la Esperanta
Civito
Pozitive:
— La relative bona kulturnivelo de diversaj jubileaj eventojaroj, kun
pozitiva eĥo ankaŭ ekstere, interalie la Google-honorigo la 15an de decembro.
— La progreso de la studoj kaj kritikaj analizoj pri Zamenhof kaj
lia ideologio, markita per kelkaj libroj kaj la unua Simpozio pri Homaranismo
en Svislando.
— La ekspansio de la LingvoTesta Sistemo de la Esperanta Civito,
bazita sur la Komuna Eŭropa Framo de Referenco.
— La kreskanta aktiveco en Afriko, malgraŭ severaj malfacilaĵoj.
Negative:
— La revekiĝo de persekutemo kontraŭ la esperanta popolo, aparte rimarkebla
dum UK en Bjelostoko.
— La financaj kaj reputaciaj malfacilaĵoj ĉe pluraj institucioj,
jen ĉefe pro la ĝenerala konjunkturo (Esperantic Studies Foundation),
jen ĉefe pro malkompetenta administrado (Kastelo Greziljono), jen ĉefe
pro manko de ideoj kaj laborfortoj (La Kvinpetalo), jen ankaŭ pro ŝtelo
de mono (Internacia Esperanto-Instituto).
— La ridindeco de la kampanjo Change por Obama, kie UEA engaĝis
sin ĝis kompromitiĝo.
— La kreskanta tensio inter Roterdamo kaj Afriko, specife inter la
ĝenerala direktoro / estraro de UEA kaj ĉefaj afrikaj aktivuloj.
Josef
Ŝemer
Israelo
Sekretario de Esperanto-Ligo en Israelo; eksa Komitatano A de UEA
Sendube la Universala Kongreso de UEA, okazinta en 2009 en Bjalistoko,
estis la plej elstare sukcesa okazaĵo en Esperantujo. El ĉiuj 20 UK-oj,
kiujn mi partoprenis, ĝi estis eble la plej bona: riĉenhava, bone organizita,
vere memorinda. Mi neniam antaŭe partoprenis UK-on, kiun organizis ne
nur la lokaj esperantistoj sed ankaŭ la gastiganta urbestraro. Mi opinias
ke dank' al tio ni ricevis ĉi-jare tre riĉenhavan kunvenon, multe pli
ol kutime. Ekzemple, okazis 38 artaj programeroj. Tio estas kulmino, ĉar
en aliaj kongresoj ili nombris maksimume 15.
La plej granda malsukceso de UEA kaj de la aliaj esperantistaj asocioj
en
la lastaj jaroj estas la fakto, ke malgraŭ la alta nombro de la personoj,
kiuj lernas nian lingvon Interrete, nur tre malmultaj fariĝas poste aktivaj
esperantistoj. Ekzemple: al Lernu!
aligis ĝis nun multaj dekmiloj da homoj. Pri tiuj el ili, kiuj finis la
kurson, mi demandas: kie ili estas nun?
Spomenka
Štimec
Kroatio
Verkistino, sekretario de Kroata Esperanto-Ligo
Mi ŝatus, kiel la plej pozitivan eventon de 2009 elstarigi la engaĝiĝon
de la urbo Bjalistoko por la sukceso de la 94a Universala Kongreso de Esperanto.
Ni havu pluajn tiajn urbojn en kiuj Esperanto hejmas.
La plej fiaska ne venas momente en mian kapon.
José
Antonio Vergara
Ĉilio
Estrarano de UEA pri faka kaj scienca agado
Estas tre agrable tuj trovi menciindajn pozitivaĵojn laŭ mia propra subjektiva
rigardo al la vivo de Esperantujo:
1. la Bjalistoka UK estis aparte bona, precipe pro la emocia reveno
al la loko kie Zamenhof vivis kaj revis, kaj ankaŭ pro la malofta sperto
senti ke aŭtoritatoj kaj surstrataj homoj opinias Esperanton grava kaj
subteninda. Mi esperas ke ĝi efikos por retrovi niajn radikojn kiel socie
engaĝita kultura kaj eduka movado, kiu tute ne bezonas la lukson de riĉaj
hoteloj kiel kongresejon.
2. la neatendita, belega donaco de Google por la Zamenhof-tago. Tio
estis vere ĝojiga kaj efika informocele, kaj pruvas la fakton ke oni inteligente
povas trovi rimedojn videbligi nian aferon.
3. la trafa eldono ĉe FEL de Origino de Specioj en la Darwin-jaro,
kaj la okazokapto lanĉi per ĝi la serion Scienca Penso.
4. la daŭra kreskado de la Esperanta
Vikipedio.
5. la sankcio en la brazila Senato de leĝopropono pri laŭelekta instruado
de Esperanto en mezlernejoj, kaj la agado de aktivuloj de UEA kaj Edukado.net
ĉe ALTE (KER).
Tre malpozitiva estis la novaĵo pri ŝajna fraŭdo al IEI.
La Ondo de Esperanto, 2010, №2 (184).
Legu la respondojn al la pli fruaj jar-enketoj de La Ondo
Enketo 2007
| Enketo 2008
Novaĵoj | Enirpaĝo