Konciza biografio de Anton Ĉeĥov

1860. En Taganrog (17 jan, laŭ la Julia kalendaro) naskiĝis Anton Pavloviĉ Ĉeĥov (Антон Павлович Чехов) en la familio de Pavel Jegoroviĉ Ĉeĥov kaj Jevgenija Jakovlevna Ĉeĥova (fraŭline: Morozova).

1869–1879. Lernado en la klasika gimnazio de Taganrog.

1876. Bankroto de Pavel Ĉeĥov. La familio forveturas al Moskvo, sed Anton plu lernas en Taganrog.

1877–1878. Dramo Senpatreco kaj kelkaj aliaj verkoj.

1879. Studentiĝo en la medicina fakultato de la Moskva Universitato (samjare kaj samfakultate kun L. Zamenhof).

1880 La unua publikigita verko: Letero al klera najbaro en peterburga semajnĵurnalo Strekoza (Libelo).

1881–1882. Komenco de kunlaboro, sub diversaj pseŭdonimoj, en humuraj revuoj Zritelj (Spektanto), Budiljnik (Vekhorloĝo), poste precipe en Oskolki (Vitreroj).

1884. Fino de la universitato, laboro en la zemstva malsanulejo en la bieno Ĉikino, apud Voskresensk. La unua presita libro: Fabeloj de Melpomeno. La unua pulmosangado.

1885. Komenco de kunlaboro en Peterburgskaja gazeta. La unua restado en Peterburgo. Konatiĝo kun A. Suvorin kaj D. Grigoroviĉ.

1886. La unua rakonto en Novoje vremja (La Nova Tempo) de Suvorin. La dua libro: Buntaj rakontoj.

1887. Du libroj: En krepusko kaj Senkulpaj paroladoj. Premiero de Ivanov en la teatro de Korŝ. Fino de la kunlaboro en Oskolki.

1888. Stepo en Severnyj vestnik (Norda Heroldo). Rakontoj. Premiero de Urso en la teatro de Korŝ. Akademia premio Puŝkin.

1889. Komitataniĝo en la societo de rusaj dramaturgoj. Enua historio. Novelaro Infanoj.

1890. Novelaro Malserenaj homoj. Vojaĝo al Saĥalino. Vojaĝraportoj en Novoje vremja.

1891. Kolektado de lerniloj por Saĥalino. Printempa vojaĝo en Eŭropo kun Suvorin. Helpo al malsatantaj kamparanoj.

1892. Aĉeto de bieno Meliĥovo kaj transloĝiĝo. Kuracado de malsanuloj dum la epidemio de ĥolero. Ĉambro №6.

1893. Rakonto de nekonato kaj Insulo Saĥalino en Russkaja myslj (La rusa penso).

1894. Restado en Krimeo pro la malsano. La dua Eŭropa vojaĝo. Nigra monaĥo kaj La virina regno. Laboro en la zemstvo de Serpuĥov.

1895. Aparta eldono de Insulo Saĥalino. Renkontiĝo kun Lev Tolstoj en Jasnaja Poljana (8–9 aŭg). Laboro pri konstruado de ŝoseo kaj de tri lernejoj en la distrikto Serpuĥova.

1896. Mevo, Domo kun mezanino, Mia vivo. Malsukcesa premiero de Mevo en Peterburgo (17 okt).

1897. Partopreno en la tutlanda censo (pro tio li ricevis medalon). Kolekto de dramaj verkoj kun Onklo Vanja. Akriĝo de la ftizo. Forveturo al eksterlando (1 sep). Vintro en Nico.

1898. Reveno al Meliĥovo (5 maj). En Russkaja myslj aperis Homo en ujo, Grosoj kaj Pri la amo. Konstruado de lernejo en Meliĥovo. Konatiĝo kun Olga Knipper, aktorino de la Moskva Arta Teatro (MAT). Mortis Pavel Ĉeĥov (12 okt). Vendo de Meliĥovo kaj transloĝiĝo al Jalto. Prezento de Mevo en MAT (17 dec).

1899. Ĉeĥov vendas al A. Marks la rajton pri ĉiuj siaj eldonitaj kaj eldonotaj verkoj. Ordeno de Stanislao (3a grado) pro aktiva partopreno en la popola klerigado. Premiero de Onklo Vanja en MAT (26 okt). Marks komencas eldoni la plenan verkaron de Ĉeĥov. La damo kun hundeto. Aperis la unua Esperanta traduko: Artproduktaĵo de K. Ŝidlovskij en Lingvo Internacia (1899. №11).

1900. Honora akademiano pri belarto en la Akademio de Sciencoj. En ravino. Restado en Nico.

1901. Premiero de Tri fratinoj en MAT (31 jan). Geedziĝo kun O. Kinpper (25 maj).

1902. Eksiĝo el la Akademio pro nuligo de la akademianeco de Gorjkij. Helpo al ekzilitaj studentoj. La deka (lasta) volumo de la plena verkaro. Ĉefpastro.

1903. Fianĉino. Provludoj de Ĉeriza ĝardeno. La dua eldono de la plena verkaro kiel suplemento al Niva (Grenkampo).

1904. Premiero de Ĉeriza ĝardeno en MAT je la 44a naskiĝdato de Ĉeĥov (17 jan). La malsano progresas. Forveturo kun la edzino al Germanio (3 jun). Morto en Badenweiler (2 jul). Entombigo en Moskvo (9 jul).

La datoj estas indikitaj laŭ la Julia kalendaro, ĉar la Gregoria kalendaro estis enkondukita en Ruslando nur en 1918. La diferenco inter la kalendaroj estis 12 tagoj en la 19ª jarcento kaj 13 tagoj en la 20ª jarcento.


Ĉeriza ĝardeno

Anton Ĉeĥov. Ĉeriza ĝardeno: Rakontoj, noveloj kaj dramoj. — Kaliningrado: Sezonoj, 2004. — 352 pĝ., 400 ekz. — Serio Rusa literaturo, volumo 10

Tradukis: Aleksej Birjulin, Aleksander Korĵenkov, Viktor Kudrjavcev, Valentin Melnikov, Andrej Parfentjev, Anna kaj Mati Pentus, Tatjana Vŝivceva, Vladimir Vyĉegĵanin, Aleksandr Zagvazdin

Provlegis: Michel Duc Goninaz, Sten Johansson, Wolfgang Kirschstein, Chris Long, Daniel Luez, Perla Martinelli, Gonçalo Neves

Kompilis, redaktis kaj komentariis: Aleksander Korĵenkov

Korektis: Halina Gorecka

La kovriloEnhavo


Rusa literaturo en Esperanto | Hejmo